Saturday, May 20, 2006

അവിലും മലരും


അവില്‍ എന്നു പറഞ്ഞാല്‍ ഇപ്പോഴത്തെയാള്‍ക്കാര്‍ അലര്‍ജിക്‌ മാനിഫെസ്റ്റേഷനു ഡോക്റ്റര്‍ കുറിച്ചു തരുന്ന ഫെനിറാമൈന്‍ മാലിയേറ്റ്‌ ആണെന്നു കരുതിയാലോ. സന്തോഷിന്റെ ബെര്‍ത്ത്‌ഡേ അവിലിന്റെ പടം ഇവിടെ പകര്‍ത്തി.

അവില്‍ ഏക്‌ അത്ഭുത്‌ ഭോജന്‍ ഹേ. നെല്ലു വറുത്ത്‌ ഉരലില്‍ ഇടിച്ച്‌ ഉമിയൊന്നു പാറ്റിയാല്‍ അവിലായി. ഉണ്ടാക്കാനെളുപ്പം. ഫൈബര്‍, മിനറലുകള്‍ പ്രോട്ടീനുകള്‍ എന്നിവയാല്‍ സമ്പുഷ്ടം.

വൈറ്റമിന്‍ ബി1 അഥവാ തയമിന്‍ തവിടില്‍ ധാരാളമായുണ്ട്‌ (വെള്ളം തിളച്ച്‌ അരി ചോറാകുമ്പോഴേക്ക്‌ ഇത്‌ നഷ്ടപ്പെട്ടുപോകും) തയമിന്റെ കുറവ്‌ തളര്‍ച്ച, വിളര്‍ച്ച (ഹ ഹ.. വഴിയില്‍ മരുന്നു വില്‍ക്കുന്നവന്റെ ടേര്‍മിനോളജി) മലബന്ധം, ബ്രാഡി/ടാച്ചിക്കാര്‍ഡിയ (ഹൃദമിടിപ്പിന്റെ വേഗതാ വ്യതിയാനങ്ങള്‍) മാന്ദ്യം, ഓര്‍മ്മക്കുറവ്‌, ഭയം, വിഷാദരോഗം എന്നിവക്കും ഗുരുതരമായ ഡെഫിഷ്യന്‍സി ബെറി ബെറി എന്ന മാരകമായ രോഗത്തിനും കാരണമാകുന്നു. തയമിനെ ഇവിടെ വിക്കാം http://en.wikipedia.org/wiki/Thiamine എന്നതിനാല്‍ വിസ്തരിക്കുന്നില്ല.

പൂജിച്ച (ഈ പൂജയല്ലേ പ്ലാസിബോ എഫക്റ്റ്‌!!) അവില്‍ കഴിച്ച നങ്ങേമക്കു ഗന്ധര്‍വ്വന്‍ കൂടലും, നാണൂച്ചാര്‍ക്ക്‌ പ്രേതഭയവും, കുഞ്ഞുണ്ണൂലിക്ക്‌ ഗുന്മനും ഉമ്മിണിമോള്‍ക്ക്‌ പഠിക്കാന്‍ ഉത്സാഹമില്ലാതെ പക്കിവാത പിടിച്ചിരിക്കലും ഒരുമിച്ച്‌ മാറുന്നതിന്റെ പിന്നിലെ മന്ത്രം ഇത്രയേ ഉള്ളു.

അവിലെന്തിനു നമ്മള്‍ നിത്യഭക്ഷണമാക്കിയെന്നറിയാന്‍ അതിലെ ടോക്കോട്രൈനോള്‍: (വിക്കേണ്ടവര്‍ ഇങ്ങോട്ടു പോകാം;- (http://en.wikipedia.org/wiki/Tocotrienol) എന്ന വൈറ്റമിന്‍ E ഘടകത്തെ അറിഞ്ഞാല്‍ മതി. അവിലില്‍ ധാരാളമായി കാണുന്ന കാണുന്ന ടോക്കോട്രൈനോള്‍ നമ്മുടെ കോശങ്ങളെ ഫ്രീ റാഡിക്കത്സ്‌ (ഓര്‍ക്കുന്നില്ലേ സ്നേഹക്കെണിയിലും മറ്റുമുണ്ടാകുന്ന ആ കൊലയാളിയായ അണ്ടിപോയ അണ്ണാനെ?) ഉണ്ടാകുന്നതിനെ തടുത്ത്‌ നമുക്ക്‌ ഹൃദ്രോഗം, എല്ലാത്തരം ക്യാസറുകള്‍, പ്രമേഹം, രക്തദൂഷ്യങ്ങള്‍ എന്നിവയില്‍ നിന്നും സംരക്ഷണം തരുന്നു.

അവിലെന്തിനു കുഴച്ചു കഴിക്കുന്നു?
ഇത്തിരി വെള്ളവും പഞ്ചസാരയും ചേര്‍ത്തോ കടലക്കറിയോ മീന്‍ ചാറോ ചേര്‍ത്തോ കഴിച്ചാല്‍ പോരേ എന്നാലോചിച്ചിട്ടുണ്ടോ? പോരല്ലോ. അവിലില്‍ ചേര്‍ക്കുന്ന പഴം വൈറ്റമിന്‍ എ, സി, ബി 6 എന്നിവയും ശര്‍ക്കര, ഇരുമ്പ്‌, കാത്സ്യം, പൊട്ടാസ്യം തുടങ്ങി ഒട്ടനവധി ധാതുക്കളും ലവണങ്ങളും തരുന്നു. തേങ്ങ അതിനെ ഫ്രഷ്‌ പ്ലാന്റ്‌ ഫാറ്റാലെ പുഷ്ടവും (right fat at right quantity is right)ഇത്തിരി നെയ്യ്‌ മാംസഭക്ഷണത്തില്‍ നിന്നല്ലാതെ കിട്ടാന്‍ ബുദ്ധിമുട്ടുള്ള വൈറ്റമിന്‍ ബി പന്ത്രണ്ടും തരും. നെയ്യിന്റെ കൊളസ്റ്റ്രോള്‍ കെണി അതിശക്ത കീലേറ്റര്‍ ആയ ശര്‍ക്കര തടുക്കും ഫ്രീ റാദിക്കലെങ്ങാനുണ്ടായാല്‍ ടോക്കോട്രൈനോള്‍ തവിടിലുണ്ട്‌. ഇതു തന്നെ അമൃതെന്ന് എനിക്കു സംശയമില്ല.

ചോക്കിംഗ്‌ ഹസാര്‍ഡ്‌
അവില്‍ ചെറിയ കുട്ടികള്‍ക്ക്‌ തൊണ്ടയില്‍ കുടുങ്ങിപ്പോയേക്കാം, അണ്ണാക്കില്‍
ഒട്ടിപ്പിടിക്കാവുന്ന ആകൃതിയുമുള്ളതിനാല്‍ കൂടുതല്‍ അപകടകാരിയായേക്കാം കുട്ടികള്‍ക്ക്‌ അവില്‍ നനച്ചത്‌.

നാട്ടറിവ്‌
അവിലിന്റെ വകയില്‍ ഒരു കസിന്‍ ആണ്‌ മലര്‍ എന്ന നമ്മുടെ പോപ്പ്‌ നെല്ല്. ഇതിയാനും അസ്സല്‍ ഭക്ഷണം, സായിപ്പിന്റെ ചോളപ്പൊരി പോലെ ഉപ്പും എണ്ണയും ചേര്‍ത്തല്ല, വെറുതേ വറുത്തു പൊട്ടിച്ചെടുക്കുകയാല്‍ ആരോഗ്യകരം, അവിലിന്റെ അടുത്തൊക്കെ വരുന്ന സമ്പുഷ്ടിയും. ഗ്യാസ്‌ ട്രബിള്‍ പ്രത്യേകിച്ച്‌ ഗര്‍ഭിണികള്‍ക്കും പുളിച്ചു തികട്ടല്‍ അഥവാ ആസിഡ്‌ റിഫ്ലക്സ്‌- GERD (ദോ ലങ്ങോട്ട്‌ വിക്കിക്കോ http://en.wikipedia.org/wiki/GERD) എന്നീ കാരണങ്ങളാല്‍ ഉണ്ടാകുന്ന വായുകോപം പിടിച്ച പിടിയാല്‍ നിറുത്താന്‍ ഒരെളുപ്പ വഴിയാണ്‌ മലര്‍ ഇട്ടു തിളപ്പിച്ച വെള്ളം കുടിക്കല്‍ (ജീരകവെള്ളം ഇടുന്നതു പോലെ ഒരു പിടി മലര്‌ വെള്ളത്തിലിട്ടു തിളപ്പിക്കുക അത്രയേ ഉള്ളു ഇതിന്റെ റെസിപ്പി}

ഈ പോസ്റ്റ്‌ അവില്‍ക്കൊതിയന്‍ ഏവൂരാനും അവിലിയന്‍ നൊവാള്‍ജിയ പിടിച്ചിരിക്കുന്ന പ്രാപക്കും സമര്‍പ്പിതം;
(അല്‍ ടോ
1. പണിക്കൂടുതല്‍ കാരണം ഇരിക്കപ്പൊറുതിയില്ലാതായ ഡോക്റ്റര്‍മാര്‍ ഇന്നലത്തെ ഗള്‍ഫ്‌ ന്യൂസ്‌ ഫ്രൈഡേ മാസികയില്‍ UAE യില്‍ ഭയാനകമാം വിധം ഹൃദയ ധമനീരോഗങ്ങളും ക്യാന്‍സറുകളും മറ്റ്‌ ജീവിതരീതീജന്യമായ അസുഖങ്ങളും വര്‍ദ്ധിക്കുന്നെന്ന് "കുറച്ച്‌ മര്യാദക്ക്‌ തിന്നിനെടാ ഹിമാറുകളേ"സൂചനയോടെ ഒരു ഉപന്യാസം പ്രസിദ്ധീകരിച്ചിട്ടുണ്ട്‌. അവര്‍ നിരത്തുന്ന സ്റ്റാറ്റിസ്റ്റിക്സ്‌ കേട്ടാല്‍ മാത്രം മതി മനുഷ്യന്‍ അറ്റാക്ക്‌ വന്നു തീര്‍ന്നു പോകാന്‍.

2. ധമനീരോഗം മാനസികമായ പ്രശ്നങ്ങളുമായി ബന്ധപ്പെട്ടതാണെന്ന് സായ്പ്പന്മാര്‍ ഇപ്പോഴല്ലേ പ്രബന്ധമെഴുത്ത്‌ തുടങ്ങിയത്‌, കവി ബിച്ചു തിരുമല ഇരുപത്തഞ്ച്‌ വര്‍ഷം മുന്നേ "തെയ്യാട്ടം ധമനികളില്‍-മനസ്സില്‍ രഥോത്സവം" എന്ന് മനസ്സിലുണ്ടാവുന്ന പ്രശ്നങ്ങളും ധമനീ സങ്കോചവും തമ്മിലുള്ള ഈ പെയറിംഗ്‌ വ്യക്തമായി വിശദീകരിച്ചിട്ടുള്ളതാ. അല്ലെങ്കിലും നമ്മള്‍ ഇന്ത്യക്കാരുടെ വാക്കിനു വിലയില്ലല്ലോ.)

32 comments:

ഡ്രിസില്‍ said...

ദേവേട്ടാ.. ആരോഗ്യം എന്തുമാവട്ടെ.. ആ അവിലില്‍ നിന്നും കുറച്ചെടുത്ത് അജ്‌മാനിലേക്ക് കൊടുത്തയച്ചേര്... ഞാനിവിടെ കാത്തിരിക്കുന്നുണ്ട് ട്ടോ...!!

Thulasi said...

ഇനി എപ്പോഴാ ഒരു ഗണപതി ഹോമം കഴിക്ക്യ എന്ന്‌ ഞാനെത്ര വട്ടം ചോദിച്ചിട്ടുണ്ടെന്നോ...
വാരി തിന്നാന്‍ തോന്നുന്നു :)

kumar © said...

ദേവാ, ഉള്ളിലൊരു കൊതിയുടെ ഉറവ പൊട്ടി.
(എങ്കിലും കിട്ടിയ ചാന്‍സില്‍ ഞാനൊന്നിട്ട് ഇളക്കിക്കോട്ടെ.

പക്ഷെ, ഈ ചിത്രം കണ്ടിട്ട്
മക്കള്‍ക്ക് വേണ്ടി‍ അവില്‍ ചക്കരചേര്‍ത്ത് കുഴച്ചപ്പോള്‍ മധുര കൊതിയനായ ഷുഗറുള്ള വല്യപ്പനു വല്യമ്മ ഒളിച്ചു കൊണ്ടുപോയി കൊടുത്തത് തുറന്നു വച്ചപോലുണ്ട്.

മറ്റൊരു രീതിയില്‍ പറഞ്ഞാല്‍, വേഗം ചിത്രം എടുത്തു പണ്ടാരടങ്ങീട്ട് വേണം ആരും കാണാതെ ഇതു മുയുവനും അകത്താക്കാന്‍ എന്നപോലെ.

ആ ഇലയില്‍ അതിനെ ഒന്നു ഒതുക്കിവച്ച് പത്രതാളൊക്കെ മാറ്റി ഈ പടം എടുക്കാമാ‍യിരുന്നില്ലേ.
കാഴ്ചക്കാരെഉടെ നാവില്‍ ഡബിള്‍ നെഹ്രു ട്രോഫി നടത്താമായിരുന്നല്ലൊ.

കേരളീയന്‍ said...

തെയ്യാട്ടം ധമനികളില്‍ - വായിച്ചു ഞാന്‍ ചിരിച്ച് ചിരിച്ച് എന്റെ ഫ്രീ റാഡിക്കല്‍‌‌സ് എല്ലാം ഇളകിയെന്നാ തോന്നുന്നത് :)

prapra said...

ഇന്നത്തെ ബ്രേക്ക്‍ഫാസ്റ്റ്, അവില്‍ ഉപ്പ്മാവ് ആയി കൊണ്ടിരിക്കുന്നു. ഇന്നലത്തെ പോസ്റ്റ് കണ്ടപ്പോള്‍ കൊതി കൂടിയതാ, അപ്പോഴേക്കും പിന്നേം ഒരെണ്ണം.

ഉമേഷ്::Umesh said...

ഏവൂരാനേ,

എന്താ ചില പിന്‍‌മൊഴികളില്‍ ഇ-മെയില്‍ ഹെഡറുകളും പിന്നെ വേറേ ഒരുപാടു കുന്തവും കൂടി വരുന്നതു്? ഇതു മുമ്പു കണ്ടിട്ടില്ലല്ല്..

evuraan said...

ഉമേഷേ,

ഗൂഗിളെന്തെക്കയോ മാറ്റങ്ങള്‍ വരുത്തിയിരിക്കുന്നു.
ഈ-മെയിലുകള്‍ ചില നേരത്ത് മള്‍ട്ടിപാര്‍ട്ട് ആണ്.

X-Google-Language: എന്നാണ് രണ്ടാം പാര്‍ട്ട് തുടങ്ങുന്നത്, അവിടെ CZECH,UTF8
എന്നും മറ്റും തോന്നുന്ന തരത്തിലാണ്.

കോഡ് ഞാന്‍ അല്പം മാറ്റിയിട്ടുണ്ട്, പിടിച്ചു നില്‍ക്കണ്ടേ..?

ഫിക്സിയെന്ന് കരുതുന്നു, ഇനിയും എന്തെങ്കില്‍ം കാണുന്നെങ്ങ്കില്‍ അറിയിക്കുക.

evuraan said...

ഉമേഷേ,

ഗൂഗിളെന്തെക്കയോ മാറ്റങ്ങള്‍ വരുത്തിയിരിക്കുന്നു.
ഈ-മെയിലുകള്‍ ചില നേരത്ത് മള്‍ട്ടിപാര്‍ട്ട് ആണ്.

എല്ലാത്തിലും അതില്ല താനും...

കോഡ് ഞാന്‍ അല്പം മാറ്റിയിട്ടുണ്ട്, പിടിച്ചു നില്‍ക്കണ്ടേ..?

ഫിക്സിയെന്ന് കരുതുന്നു, ഇനിയും എന്തെങ്കില്‍ം കാണുന്നെങ്ങ്കില്‍ അറിയിക്കുക.

6:23 PM

Inji Pennu said...

അതു ശരി! അപ്പൊ ചുമ്മതല്ല കുചേലന്‍ കൃഷ്ണനു അവലു കൊടുത്തതു അല്ലേ?കൂട്ടുകാരനു
‘ഹെല്‍ത്തി ഫൂഡ്’ കൊടുത്തതാണല്ലേ?

ഞാന്‍ അവലു നനച്ചപ്പോള്‍ ഇത്രേം ഒന്നും ആറിയത്തില്ലായിരുന്നു.ഇപ്പൊ അവലിനോടു ഭയങ്കര റെസ്പ്ക്റ്റ് തോന്നുന്നു. ചേട്ടന്റെ ഈ ലേഖനം ഞാന്‍ ഇങ്ലീഷില്‍ എന്റെ ഫൂഡു ബ്ലോഗില്‍ ഇട്ടോട്ടെ വിത്ത് ലിങ്കിങ്ക് റ്റു യൂ?

Anonymous said...

ദേവാ.., അവില്‍ ഉണ്ടാക്കാന്‍ എളുപ്പം ഹേ, ലെകിന്‍ ചവച്ചു മടുക്കും ഹേ അതുകൊണ്ടു പല്ലിനും നല്ല വ്യയാമം ഹേ, എന്നുകൂടി.. .
കവിയൂര്‍ അമ്പലത്തിലും ഇതാണു പ്രസാദം.

ബിന്ദു

ദേവന്‍ said...

ഡ്രിസിലേ,
ഈ പൊതി തുറന്നത്‌ 25 പിള്ളേരു കൂടി നില്‍ക്കുന്നയിടത്തായിരുന്നു. ക്യാമറയുടേ ഫ്ലാഷ്‌ അണയും മുന്നേ..സംഭവം തീര്‍ന്നു. യക്ഷിപ്പനയുടെ ചുവട്ടില്‍ നഖവും മുടിയും കിടക്കുമ്പോലെ ഒരു കെറിയ വാട്ടയിലയും മാതൃഭൂമിക്കഷണങ്ങളും മാത്രമവശേഷിച്ചു.

അമ്പലം അലര്‍ജിയായിരുന്ന പ്രായത്തിലും ഗണപതിഹോമമെന്നു കേട്ടാല്‍ ഞാനും പതുക്കെ ഒരു റൌണ്ട്‌ അവിടെ അടിക്കുമായിരുന്നു തുളസിയേ.

കുമാറേ, ശ്രദ്ധിച്ചാല്‍ ക്യാമറ ബൂട്ട്‌ ആകുന്നതിനു മുന്നേയടിച്ച പടമാണെന്ന് അറിയാം അല്ലേ? സത്യം കുമാര്‍ പറഞ്ഞതു തന്നെ. ഒരു ക്ലിക്കിനു ശേഷം വാരാമെന്നു വച്ചതാ.. പിള്ളേരു ഒരു ഇംക്രീം മാത്രം എനിക്കു തന്നിട്ട്‌ എടുത്തോണ്ടോടിക്കളഞ്ഞില്ലേ..

കേരളീയാ, സ്വാഗതം!

പ്രാ, (അടുത്ത കൂട്ടുകാരെ സര്‍നെയിം വിളിക്കില്ല ഞാന്‍, സോ രണ്ടാം പ്രാ കളഞ്ഞു!) എണ്ണ/നെയ്യൊരുക്കുന്ന ഫ്രീ റാഡിക്കല്‍ കെണിയൊഴിച്ചാല്‍ സാള്‍ട്ട്‌ മാങ്ങോ ട്രീയും (നല്ല ഭക്ഷണമാ)

ഏവൂരാന്‍ & ഗുരുകുലം വളര്‍ത്തിയ കുളിരേ കുവലയമിഴിയാം അഴകേ,
എന്താ പ്രശ്നമെന്ന് എനിക്കു മനസ്സിലായില്ല. എന്തായാലും വേഗം ഫിക്സ്‌ ആയി കമന്റു ഗ്രൂപ്പിന്റെ ഫിറ്റ്‌സ്‌ മാറട്ടേയെന്ന് ആശംസാ പുഷ്പങ്ങള്‍ നിങ്ങള്‍ക്കായി.

എല്‍ ജീ, അവല്‍ ഭക്ഷണതിലെ പുലിയാണപ്പാ സാക്ഷാല്‍ വ്യാഘ്രം. ഈ പോസ്റ്റ്‌ എടുത്തോണ്ടു പോകുന്നതില്‍ എനിക്ക്‌ അഭിമാനം ബ്ലെന്‍ഡഡ്‌ വിത്‌ നാലു പേര്‍ക്കു
കൂടെ വായിക്കാം എന്ന സന്തോഷമേയുള്ളൂ (പാചക ബ്ലോഗ്‌ ഇപ്പോഴാ കണ്ടത്‌. സൂ, രേഷ്മ, കലേഷാദികള്‍ക്കും പാചകത്തിന്റെ അസ്കിതയുണ്ട്‌. എല്ലാ ബ്ലോഗ്ഗും കൂടെ ആര്‍ എസ്‌ എസ്‌ സിന്‍ഡിക്കേറ്റോ മറ്റോ ചെയ്ത്‌ ഒരു പാചക മഹാബ്ലോഗ സംഗമം ആക്കാന്‍ എന്തോവഴിയുണ്ട്‌ . മുകളില്‍ കണ്ട രണ്ട്‌ കമ്പ്യൂട്ടര്‍ പുലികളോ പെരിങ്ങോടനോ അനിലേട്ടനോ വിശദീകരിച്ചുതരും സിന്‍ഡിക്കേ.‍ താല്‍പ്പര്യമുണ്ടെങ്കില്‍..
ബിന്ദൂ, എന്റെ ഭാര്യവീട്‌ കവിയൂരടുത്ത്‌ മല്ലപ്പള്ളിയിലാ, നമ്മളറിയും വടപ്രിയന്‍ ആഞ്ജനേയനെ . (അവല്‍ നല്ലപോലെ നനച്ചാല്‍ നല്ല മൃദുവാകും. താടിയിലെ മസിലിനു മിനിമം വ്യായാമം ഹേ)

viswaprabha വിശ്വപ്രഭ said...

പതുക്കെ പതുക്കെ ഞാന്‍ പിന്‍‌വലിഞ്ഞുകൊണ്ടിരിക്കുകയാണീ കര്‍മ്മഭൂമിയില്‍ നിന്നും...

എങ്കിലും ഇനിയും ഇതു പറയാതെ നിവൃത്തിയില്ല...

കഴിഞ്ഞ ഒന്നരവര്‍ഷത്തിനുള്ളില്‍ എനിക്കു കണ്ടെത്താനായ ഏറ്റവും മികച്ച ജീനിയസ് ആണ് ദേവാനന്ദന്‍ പിള്ള!

സായൂജ്യമായി....!

പകര്‍ന്നു കൊടുത്ത തീ ആളിപ്പടര്‍ത്തുന്ന പന്തത്തിനെ കാണുന്ന തിരി പോലെ എനിക്കിനി കൃതാര്‍ത്ഥതയോടെ കെട്ടു പോകാം...!

സ്നേഹിതന്‍ said...

അവിലും മലരും അറിവും പകര്‍ന്നു നല്‍കാന്‍ ദേവരാഗം തന്നെ മുന്നില്‍ !
പ്രലോഭിപ്പിയ്ക്കുന്ന ചിത്രം!

സു | Su said...

ചൂടുള്ള പാലില്‍ അവില്‍‍ ഇട്ട് ചൂടോടെ തന്നെ തിന്നുക,

ചൂടുള്ള ചായയില്‍ അവില്‍ ഇട്ട് ചൂടോടെ തിന്നുക,

(മുകളിലെ രണ്ടിനും സ്പൂണ്‍ ഉപയോഗിക്കേണ്ടതാണ്. ആക്രാന്തം കാണിച്ചാല്‍ കൈയും വായയും പൊള്ളും)

പഞ്ചസാരയും തേങ്ങയും,പഴം ചെറുതായി അരിഞ്ഞതും അവിലില്‍ ഇട്ട് കുറച്ച് വെള്ളം കുടഞ്ഞ് കുഴച്ച് തിന്നുക,

ശര്‍ക്കരയും തേങ്ങയും പഴം ചെറുതായി അരിഞ്ഞതും ഇട്ട് വെള്ളം കുടഞ്ഞ് അവില്‍ കുഴച്ച് തിന്നുക,

വറുത്തു വെച്ച അവില്‍, ‍ തേങ്ങാക്കൊത്തും കൂട്ടി കടിച്ച് കറുമുറു തിന്നുക,

അവില്‍ ഉപ്പുമാവുണ്ടാക്കി തിന്നുക.

അവിലും മലരും തേങ്ങയും പഞ്ചസാരയും കൂട്ടിക്കുഴച്ച് തിന്നുക(വെള്ളം ഇല്ലെങ്കില്‍ സാരമില്ല, പഞ്ചസാര അലിഞ്ഞാല്‍ മലര്‍ മൃദു (ഓ...മൃദുലേ...ഹൃദയമുരളിയില്‍ ഒഴുകിവാ )ആവും, പിന്നെ അവില്‍ കുറച്ച് കട്ടിയില്‍ നിന്നാലും പ്രശ്നമില്ല.)

ശര്‍ക്കര പാവുകാച്ചി അവിലും തേങ്ങയും ഇട്ട് യോജിപ്പിച്ച് തിന്നുക.(പല്ലുള്ളവര്‍ക്ക് മാത്രം പറ്റിയ ജോലി ആണേ).

എല്ലാത്തിലും ചിരവിയ തേങ്ങ ആണ് ഇടുക കേട്ടോ.

ഇത്രേ ഞാന്‍ ചെയ്യാറുള്ളൂ. ഇന്നസെന്റ് ചോദിക്കുന്നത് പോലെ “എന്തേ വല്ല കൊഴപ്പോം ഇണ്ടാ?”

ഇനി പരീക്ഷിക്കാന്‍ പോകുന്നത് വറുത്ത അവില്‍ പൊടിച്ച് പുട്ട്, അവില്‍ ഉണ്ട, അവില്‍ ബിരിയാണി...(പേടിക്കേണ്ട പരീക്ഷണത്തില്‍ നിന്ന് ചേട്ടനെ ഒഴിവാക്കിയിട്ടുണ്ട്)

ഇപ്പോള്‍ മനസ്സിലായില്ലേ ഞാനും അവിലും തമ്മിലുള്ള ആത്മബന്ധം?

ഗന്ധര്‍വ്വന്‍ said...

പ്റിയ വിശ്വപ്രഭ, അങ്ങു ദേവനെഴുതിയ കമെന്റാണു എന്നെ ഇതെഴുതിക്കുന്നതു. ബ്ളോഗില്‍ അങ്ങയുടെ സാന്നിദ്ധ്യം അഭിലഷണിയവും അത്യന്താപേക്ഷിതവുമായി കരുതുന്ന ഒരാളാണു ഞാന്‍. അങ്ങയുടെ വാക്കുകള്‍ വല്ലത്തൊരു വികാരം എന്നിലുണറ്‍ത്തുന്നു. അങ്ങും ഏതൊ കടുത്ത വികാര സമ്മ്റ്‍ദ്ധത്തില്‍ എഴുതിയതു പൊലെതൊന്നുന്നു. ഞങ്ങള്‍ക്കതറിയാന്‍ ആകാംക്ഷയുണ്ടു. അങ്ങു വിശദ മാക്കുമോ?.

സസ്നേഹം

സുനില്‍ said...

പൃഥുകം താവക ഇത്ര മഥുരമെന്നതു ഞാനും..
മതിയിലോര്‍ത്തിരുന്നല്ലീ
കുതുകം പ്രേമ മഹാത്മ്യം..
-സു-

Anonymous said...

“മധുരമെന്നതു ഞാനും” എന്നുവായിക്കാനപേക്ഷ.

Anonymous said...

ഹാ, അങനെ ഗന്ധര്‍വ്വനും ബൂലോകത്ത്‌ അവതരിക്കുന്നു!-സു-

കണ്ണൂസ്‌ said...

ഒരു സ്പൂണ്‍ എണ്ണയിലോ നെയ്യിലോ ( ദേവാ. ക്ഷമി. താലിബാന്‍കാരനോട്‌ സുവിശേഷം പറയുന്ന പോലെയാണെന്ന് അറിയാം.) അല്‍പം ഇഞ്ചി വറുത്ത്‌, കുറച്ച്‌ കടുക്‌ പൊട്ടിച്ച്‌, കരിവേപ്പില ഇട്ട്‌, ഒരു പച്ച മുളക്‌ അരിഞ്ഞിട്ട്‌, മഞ്ഞപ്പൊടിയും ഉപ്പും ആവശ്യത്തിന്‌ ചേര്‍ത്ത്‌, സവാള നന്നായി വഴറ്റി, വേവിച്ചുടച്ച ഉരുളക്കിഴങ്ങ്‌ ഇട്ട്‌ പേസ്റ്റ്‌ പരുവത്തിലാക്കി അതില്‍ നനച്ച അവില്‍ ചേര്‍ത്ത്‌ കഴിക്കാനും ബഹു രസമാണേ. വടക്കന്‍ ഭാരതീയര്‍ ആലു-പോഹ എന്ന് പറയും.

അതുല്യ said...

ഒരു പിടി അവിലും കൊണ്ടു പോനാന്‍.....

അല്ലാ ഒരല്‍പം അവിലു തിന്നാന്‍ ഈ പുകിലോ? പലചരക്ക്‌ കട യോഹന്നാന്റെ കടയിലു പോയി, 2 കിലോ മട്ടയരി, 1/2 കിലോ പഞ്ചസാര എന്നൊക്കെ പറയുന്നതിനിടയില്‍, ചാക്കിലെ അവില്‍ അല്‍പാല്‍പം വായിലിട്ടാ ഈ സൂ പറയുന്ന് പാടൊന്നും ഇല്ല്ല്യാണ്ടേ അവിലു ഓസാം. അല്ലാ വീട്ടിലുള്ളവര്‍ക്കും കൂടിയാവാംന്ന് വച്ച്a, നനച്ച ഒരു തോര്‍ത്ത്‌ കൊണ്ട്‌ പോയി അവില്‍ ചാക്കിന്‍ മുകളില്‍ വയ്കുക, കുറച്ച്‌ കഴിയുമ്പോ എടുത്തോണ്ട്‌ പോരുക. സുഖം സമൃദ്ധം.

വിശ്വം പറഞ്ഞത്‌ തന്നെ ഞാനും പറയുന്നു. എന്നാലും അത്രയ്ക്‌ അങ്ങട്‌ പറയാന്‍ മനസ്സങ്ങട്‌ സമ്മതിയ്കിണ്ണില്ല്യ.

വക്കാരിമഷ്‌ടാ said...

ദേവേട്ടാ, വളരെ വളരെ വിജ്ഞാനപ്രദം. നമിച്ചിരിക്കുന്നു. ഇതൊന്നുമറിയാതെയാണെങ്കിലും അവിലും ശര്‍ക്കരയും പാളയംകോടന്‍ പഴവും എന്റെ ഒരു അടിനൊസ്സായിരുന്നു. ഇപ്പോ കുറച്ചേറെ നാളായി അതൊക്കെ കഴിച്ചിട്ട്. അവില്‍+ശര്‍ക്കരയില്‍ പാ‍ളയങ്കോടന്‍ പഴം തന്നെ ബെസ്റ്റ്. അതിന്റെ അളവ് കുറച്ച് കൂടി സംഗതി മൊത്തം കൊഴ കൊഴാ എന്നായിട്ട് വെട്ടി വെട്ടി വിഴുങ്ങണം. ആ..ഹാ..

അവിലായതുകൊണ്ടാവും സംഗതി പെട്ടെന്ന് തീര്‍ന്ന് ദേവേട്ടന്‍ അഭിവാദ്യങ്ങളും പറഞ്ഞ് കട പൂട്ടിയത്.. ല്ലേ

കുറുമാന്‍ said...

അവിലിനേകുറിച്ചും, മലരിനേകുറിച്ചും മാത്രം പറഞ്ഞപ്പോള്‍, പാവം എന്റെ “പൊരി” യെ മാത്രം എന്തേ മറന്നു?

ഉത്സവം, പൂരം, ഭരണി, വേല, പിണ്ടിപെരുന്നാള്‍, പെരുന്നാള്‍ തുടങ്ങിയവയ്ക്ക്, അമ്പലം, കാവ്, പള്ളികളില്‍ പോയി ആര്‍മാദിച്ച്, കൊച്ചു വെളുപ്പാന്‍ കാലത്ത് തിരികെ വരുമ്പോള്‍, ഒരു പൊതി പൊരി വാങ്ങാത്ത ആരുണ്ട്?

പൊരി ചായയിലിട്ടു കഴിക്കാന്‍ എന്തു രസം?
സ്ക്കൂളിനു മുന്‍പിലെ മിട്ടായി ഭരണികളൊന്നില്‍ നിങ്ങള്‍ പൊരിയുണ്ട കണ്ടിട്ടില്ലേ?

പഴയ കുപ്പി, പാട്ട, പേപ്പര്‍ തുടങ്ങിയവ വാങ്ങാന്‍ വരുന്ന പാണ്ടി പണ്ടാരങ്ങള്‍ ബാര്‍ട്ടര്‍ സമ്പ്രാദായത്തില്‍, പകരം പൊരി തരാറുള്ളതോര്‍മ്മയില്ലേ?

ഒരു പൊരി ഫാന്‍സസോസിയേഷന്‍ നിര്‍മ്മിക്കാന്‍ ഇവിടെയാരുമില്ലേ????

അതുല്യ said...

കുറുമാനേ.. അരി മൂത്രത്തിലു കുതിര്‍ത്തി വറുക്കണതാ പൊരി എന്നാ എന്റെ വീട്ടിലു പറയുക. അതും കേട്ട്‌ പൊരി വായിലുടുമ്പോഴുള്ള ഉപ്പു രസം കൂടിയാവുമ്പോ എന്തോ ഒരു അസ്കിത തോന്നിയിരുന്നു. എന്നാലും ഉത്സവ പറമ്പിലേയ്ക്‌ ഒന്ന് മനസ്സ്‌ ഓടി പോയി കുറുമാനേ.

.::Anil അനില്‍::. said...

"നാട്ടറിവ്‌" എന്ന തലവാചകത്തില്‍ ദേവന്‍
“അവിലിന്റെ വകയില്‍ ഒരു കസിന്‍ ആണ്‌ മലര്‍ എന്ന നമ്മുടെ പോപ്പ്‌ നെല്ല്. “ അതു തന്നെയല്ലേ ഈ പൊരി കുറുമേ? സോറീ കുറുമാനേ?

പൊരീന്റെ കാര്യം ഓര്‍ക്കുമ്പോള്‍ ഒരു ചമ്മല്‍ മറക്കാന്‍ വയ്യ. ഒരു കൊളീഗിന്റെ (ഹൈദരാബാദി) വീട്ടില്‍ സപ്പോര്‍ട്ടിനു പോയി. ആഹാരനേരം ആയതിനാല്‍ ഒരു പ്ലേറ്റില്‍ ഫ്രൈഡ് റൈസ് കൊണ്ടുതന്നു.
‘സോറി. രാത്രി ഞാന്‍ ഇങ്ങനത്തതൊന്നും കഴിക്കില്ലാ‘ന്നു പറഞ്ഞു നോക്കി. ഓന്‍ വിട്ടില്ല. അല്പം ടേസ്റ്റു നോക്കിയാല്‍ മതീന്ന്‍.
നോക്കിയപ്പോള്‍ മനസിലായി അത് ഫ്രൈഡ് റൈസല്ല. ‘കുര്‍മുറ’ കൊണ്ടുള്ള ഉപ്പുമാവുപോലുള്ള ഒരു ഡിഷാണെന്നു പറഞ്ഞ കൂട്ടുകാരന്‍ അതുണ്ടാക്കുന്നവിധവും പറഞ്ഞുതന്നു.
കൂടുതല്‍ ചമ്മണ്ടാന്നു കരുതി അല്‍പ്പം കൂടി തരാന്‍ ആവശ്യപ്പെട്ടില്ലാന്നേയുള്ളൂ.
വെരി ടേസ്റ്റീ...
(ഇനി കുര്‍മുറയെങ്ങാനും പൊരി/മലര്‍ അല്ലാന്ന് ദേവന്‍ പറയുമോ ;) )

കുറുമാന്‍ said...

അനിലേ........അമ്മയും, അമ്മായിയമ്മയും പോലെ വിത്യാസമുണ്ട് മലരും പൊരിയും തമ്മില്‍.
ഇല്ലേ, ദേവേട്ടാ?

കേരളഫാർമർ/keralafarmer said...

നെല്ലുകുത്തി അവിലാക്കുന്നതു മുതലെ കണ്ടുള്ളൂ. നെൽ വിത്തിൽ നിന്ന്‌ കൊയ്തെടുക്കുന്ന നെല്ലുവരെക്കൂടി അറിയുന്നത്‌ നല്ലതായിരിക്കും. കാരണം വിഷങ്ങളൊന്നും ഇല്ലയെങ്കിൽ ദേവൻ പറഞ്ഞതെല്ലാം പൂർണമായും ശരിവെയ്ക്കാം. മറിച്ചാണെങ്കിൽ അവിലു കഴിച്ചാലാകും ദോഷം. ദേവ ഇങ്ങനെ എഴുതിയതിൽ ക്ഷമിക്കണെ. ദേവൻ CA or MD ഇതിൽ ഏതാണ്‌.

ദേവന്‍ said...

നേരത്തേ കടയടച്ചെന്നു പറഞ്ഞു വക്കാരി എന്റെ കുറ്റപ്പെടുത്തിയതിനാല്‍ ഇത്രേം ദിവസം തുറന്നു മലര്‍ത്തിയിട്ടിട്ട്‌ ഞാന്‍ ക്യാമ്പിങ്ങിനു പോയിരുന്നു..

വിശ്വം മാഷ്‌ ഞങ്ങളെ മടുത്തിട്ടു പോകുകയാണോ? അതല്ലാതെ എന്തു കാരണം ആണേലും ബ്ലൂലോഗര്‍ക്കതു സ്വീകാര്യമല്ല, കട്ടായം. കാല്‍നട ജാഥാ ക്യാപ്റ്റന്‍ എവൂരാന്റെ നേതൃത്വത്തില്‍ മാര്‍ച്ച്‌ ചെയ്തു വന്ന് സത്യഗ്രഹം ഇരിക്കും..


സ്നേഹിതാ, നന്ദി. നന്ദിയുടെ കാര്യം പറഞ്ഞപ്പോഴാ, ആന്ധ്രയിലെ നന്ദ്യാലാ അരി മലരും പൊരിയും ഉണ്ടാക്കലിനു പ്രശസ്തമാണേ. അലുവായില്‍ കോഴിക്കോട്‌ പോലെ.

(സൂ, listingല്‍ പാലും അവിലും combo ഒഴികേ എന്തുണ്ടാക്കിയാലും ഒരു വാക്ക്‌ പറഞ്ഞാല്‍ മതി, ഞങ്ങള്‍ കഴിക്കാനെത്താം. (പാലിനു പകരം സോയാ മില്‍ക്ക്‌ ഒഴിച്ചാല്‍ ഒരേ സമയത്ത്‌ തേങ്ങേടേം പാലിന്റേം രുചി കിട്ടില്ലേ? സജഷന്‍ അല്ലേ, അറിയാന്‍ മേലാത്ത കാര്യത്തെ കുറിച്ച്‌ സംശയം ചോദിച്ചതാ, പാചകര്‍ ആരെങ്കിലും ഉത്തരം പറയും മുന്നേ ആരും പരീക്ഷിക്കല്ലേ). അവില്‍ ബിരിയാണിയുടെ റെസിപ്പി പാചക ബ്ലോഗ്ഗില്‍ പ്രതീക്ഷിക്കാമോ (ബിരിയാണിയിലെ നെയ്യ്‌, എണ്ണ ഒക്കെ ഒഴിവാക്കാന്‍ എന്തേലും വിദ്യയുണ്ടോ?). അവില്‍ വിളയിച്ചതു കൊണ്ട്‌ അസ്സല്‍ സ്വീറ്റ്‌ പഫ്ഫ്സ്‌ ഉണ്ടാക്കാം..എല്‍ജീടെ മുട്ട പഫ്‌ റെസീഫില്‍ നിന്നും മുട്ട മാറ്റുക അവിലു കുഴച്ചത ഫില്ലിംഗ്‌ ആക്കുക.

ഗന്ധര്‍വ്വരേ,
"ലവന്മാരു തലതെറിച്ചവര്‍,
ഞാന്‍ ദേ കളഞ്ഞിട്ടു പോണു" എന്നാണോ വിശ്വം മാഷ്‌ പറഞ്ഞതെന്ന് ഒരു ഡവുട്ട്‌. നമ്മക്കെതായാലും വഴി തടുക്കാം..

സുനില്‍ "കൃഷ്ണന്‍" മാഷേ,
ഈ കുചേലന്റെ അവില്‍പ്പൊതി ഇഷ്ടപ്പെട്ടതില്‍ സാന്തോഷം (തിരിച്ചു വീട്ടില്‍ ചെല്ലുമ്പോള്‍ എന്റെ ഫ്ലാറ്റ്‌ മാറി വലിയോരു മാന്‍ഷന്‍ പ്രതീക്ഷിക്കട്ടേ?)

കണ്ണൂൊസേ
നെയ്യു പോലെ നമുക്ക്‌ ഹിന്ദിക്കറികളും രുചിക്കില്ലെങ്കിലും ഡവുട്ടിനു കുറവില്ല . ലതേ സാധനം പൊരി ഇട്ടും ഉണ്ടാകാറില്ലേ? എന്താ പേരു?

അതുല്യേ
വാണിയന്‍-വാണിയത്തി യുദ്ധ സ്റ്റ്രാറ്റജി ആണല്ലേ? ഇക്കണക്കിനൂ ഞങ്ങള്‍ കാണാന്‍ വന്നാല്‍ തിരിച്ചു വരുമ്പോ വാച്ചും മാലയും കാണില്ലല്ലോ (എനിക്കാ ഭയമില്ല, എനിക്കു വാച്ചുമില്ല, മാലയും ഇല്ല) വന്നാലും പച്ച വെള്ളം ഞാന്‍ കുടിക്കുകേലാ വീട്ടിന്നു. മലരിന്റെ റെസിപ്പി കേട്ടതോടെ മതിയായേ.

വക്കാരിയേ,
ടോപ്പ്‌ ക്വാളിറ്റി പാളേങ്കോടന്‍ പഴം ആണെങ്കില്‍ അതില്‍ വെറും അവില്‍ കുഴച്ച്‌ സൂ പറഞ്ഞപോലെ മൃദുല ആക്കി കഴിച്ചാലും അടിപൊളിയാ, പക്ഷേ അസ്സലു പഴം വേണം.. ലത്‌ ഇവിടെ കിട്ടുന്നതില്‍ യൂറിയായും അമ്മോണിയം സള്‍ഫേറ്റും എതാണ്ടൊക്കെ ചുവയുണ്ട്‌ എന്തു ചെയ്യും.

കൂറുമാനേ, അനിലേട്ടാ,
ഒന്ന്: പൊരിയെ ഞാന്‍ മറന്നതല്ലാ, ഇന്റര്‍നാഷണല്‍ സാധനം ആകയാല്‍ നെറ്റിലൊക്കെ ഇഷ്ടമ്പോലെ ഇന്‍ഫര്‍മേഷന്‍ കാണുമല്ലോ എന്നു വച്ചിട്ടു എഴുതാഞ്ഞതാ. (ഉപ്പ്‌ എനിക്കു ഇഷ്ടമല്ലാത്തതിനാല്‍ അമ്പലപ്പറമ്പീന്ന്
ഇതു വാങ്ങി കുളത്തിലെ മീനിനു ഇട്ടുകൊടുക്കുകയായിരുന്നു പത്വ്‌. ലവന്മാരു ഞുളച്ച്‌ ഞൂഴ്ന്ന് തിന്നുന്ന കാണാന്‍ എന്താ രസം.

മലരും പൊരിയും തമ്മില്‍ കുറുമാന്‍ പറഞ്ഞപോലെ അമ്മേം മദാമ്മേം തമ്മിലുള്‍ല വത്യാസം ഉണ്ട്‌ മലര്‍ നെല്ലു വറുത്തു പൊട്ടിച്ചെടുക്കല്‍ ആണ്‌ . പൊരി അരി എന്തൊക്കെയോ ചെയ്ത്‌ ആവി കേറ്റി എങ്ങനെയൊക്കെയോ ഉണ്ടാക്കുന്ന ഫാക്റ്ററി പ്രോഡക്റ്റും http://www.theanswerbank.co.uk/Food_and_Drink/Question238551.html പൊരി എന്ന puffed rice ന്റെ പാചക വിധി. അമേരിക്കന്‍ റൈസ്‌ ക്രിസ്പീസ്‌ ഇതിനു പകരം നില്‍ക്കുമെന്നും കാണുന്നു ആ സൈറ്റില്‍. എതായാലും ഹിന്ദിക്കാര്‍ ഭേല്‍പ്പുരി അമരീഷ്‌ പുരി തുടങ്ങി പലതും പൊരിയാല്‍ ഉണ്ടാക്കും.

ചന്ദ്രേട്ടാ,
എതേങ്കിലും കാലത്ത്‌ ഒരു കമ്പനിയുടെ എം ഡി ആകാന്‍ ആഗ്രഹമുണ്ടെന്നതൊഴിച്ചാല്‍ എം ഡിയും ഞാനുമായി ഒരു ബന്ധവുമില്ല :)

സുനില്‍ said...

“സുനില്‍ "കൃഷ്ണന്‍" മാഷേ,------
ശ്ശൊ ദേവാ, ഇത്‌ ഞാനാണ്. ഞാന്‍ മാത്രം -സു- എന്ന സുനില്‍ എന്ന സുനില്‍ കുമാ‍ര്‍. സുനില്‍ കൃഷ്നന്‍ വേറെ ഈ സുനില്‍ വേറെ.കൃഷ്നനെ കാണാത്ത സുനില്‍!(ഈ ഞാന്‍ എന്റെ വളരെ അടുത്ത പരിചയത്തില്‍ത്തന്നെ നാല് സുനിലു‍കളെ അറിയാം!)
തഥാസ്തു... അനുഗ്രഹിച്ചിരിക്കുന്നു.

Inji Pennu said...

ദേവേട്ടാ
ഈ പാര്‍-ബോയ്ല്ഡ് റൈസും,ഡബിള്‍ ബോയില്‍ഡ് റൈസും തമ്മില്‍ വിത്യാസം ഉണ്ടോ?
എങ്ങിനെയാണു നമ്മുടെ നാട്ടിലെ കുത്തരി ഉണ്ടാക്കണേ എന്നു പറഞ്ഞു തരോ?

ബിന്ദു said...

നെല്ലു പുഴുങ്ങി, ഒന്നു വിണ്ടു കീറുമ്പോള്‍ വെയിലത്തിട്ടു ഉണക്കി മില്ലില്‍ കൊണ്ടു പോയി കുത്തിച്ചാണു കുത്തരി ഉണ്ടാക്കുന്നതെന്നു തോന്നുന്നു, ശരിയാണോ ചന്ദ്രേട്ടാ???

Devaragam said...

അപ്പോ സുനില്‍ കൃഷ്ണന്‍ വായനശാലയുടെ ആണര്‍ അല്ലേ? \ഫഗോതീ\ എന്തരു കണ്‍ഫ്യൂ
LG,
പാര്‍ ബോയിലിംഗ്‌ എന്നാല്‍ നെല്ല് ആവിയിലും വെള്ളത്തിലും ഒരു യന്ത്രം ഉപയോഗിച്ച്‌ പുഴുങ്ങുന്ന സാങ്കേതിക വിയയുടെ പേര്‍ ആണേ. ഡബിള്‍ ബോയില്‍ എന്നു വചാല്‍ രണ്ടു പുഴുക്കന്‍ അരി അതായത്‌ രണ്ടു തവണനെല്ലു പുഴുങ്ങിയയത്‌. ( You can buy Single boiled & triple boiled )കുത്തരി ബിന്ദു പറഞ്ഞതു തന്നെ എന്നു തോന്നുന്നു (കൊല്ലത്ത്‌ കുത്തരി എന്ന പ്രയോഗമില്ല). നെല്ലു ഉരലിലും കുത്താം കേട്ടോ മില്ലിലെ ബില്ല് അങ്ങനെ ഒഴിവാക്കാം. എല്‍ജിയുടെ നാട്ടില്‍ അസ്സല്‍ പാര്‍ബോയില്‍ഡ്‌ റൈസ്‌ കിട്ടുമല്ലോ (അവിടെ നിന്നും ഇങ്ങ്ങ്ങോട്ടും ഇറക്കു മതിക്കുന്നുണ്ടേ) പ്രകൃതിചികിത്സപ്രകാരം പച്ചരി, ഉണക്കലരി എന്നിവയേ പാടുള്ളൂ, രണ്ടു തവണ പാചകം ചെയ്യരുത്‌ എന്ന rule പ്രകാരം ഒരിക്കല്‍ പുഴുങ്ങിയ നെല്ല് പിന്നെ സ്റ്റോര്‍ ചെയ്യുന്നത്‌ ചീത്ത. (എനിക്കെന്തോ 100% വിശ്വാസമില്ല അത്‌. പച്ചരി കഴിച്ചാല്‍ വയറിനു ഒരു സുഖം ഒക്കെ ഉണ്ടാവും , അല്ലാതെ..)

കേരളഫാർമർ/keralafarmer said...

ബിന്ദു: പറഞ്ഞരീതിയിൽ തന്നെ യാണ്‌ പുഴുക്കലരി (എന്റെ നാട്ടിൽ ഉണ്ടാക്കുന്നത്‌. ഒരു വ്യത്യാസം മാത്രം വെയിലത്തുമാത്രം ഇട്ട്‌ ഉണക്കിയാൽ അരി കുത്തുമ്പോൾ പൊടിയുവാൻ സാധ്യതയുണ്ട്‌. അതിനാൽ അതിന്റെ ഭാഗമായി തണലത്തും ഉണക്കുന്നത്‌ ഞാൻ കണ്ടിട്ടുണ്ട്‌. കുത്തിയെടുക്കുന്നത്‌ തവിട്‌ കളയാത്തരീതിയായാൽ നല്ലത്‌.
നെല്ലു കുത്തിയ പച്ചരി വെള്ളത്തിൽ മറ്റൊരുപാത്രത്തിൽ വെച്ച്‌ വേകിച്ചെടുക്കുന്ന രീതി ഞാൻ കണ്ടിട്ടുണ്ട്‌. അതിനെ പൂനിസിസ്‌റ്റം എന്നു പറയുന്നു.